Кладуть в селі шатор,
Піч ся вже мурує,
Йоні, ги оратор
Усім діріґує.
Зношувуться кури,
Яйця і сметана,
Открита капура
Звечора до рана.
Паленка зварена,
Свіні попалені,
Дружбове з дружками
Ходять, ги вшалені.
Вішавуть березу,
Барвінок притягли,
Нашой село криза
Іщи не досягла.
Слава Богу вшитко
Люди дома мають.
Із вариша рідко
На поміч чекають.
Сокачки в катранах
Місять, ріжуть, парять.
Єдна перед другов
Так чесно ся старать.
Лавіці поклали,
Столи накривають,
Гостяться помали,
Фіґлюють, співають.
Кіста попечені,
Оси в чоколаді,
Застивать кочоня
В пивниці на ладі.
Гентеш варить гурку,
Кось хрінь рісілює.
Мацур собі муркать,
Дідо смолі дує.
Молоді ся журять,
Май они ся мавуть.
Ліплять на капуру
«ПРОСИМЕ ЛАСКАВО!»
Пантлики, балони
Заязують діти.
Пес вже в буді конать,
Мусить всьо терпіти.
Їдіня му пахне,
Промкнув літер слини,
А тоті лем з кухні
Мичуть солонину.
Воробки всі ситі -
Тиждень ся туй гостять.
Такі ги корита
Черева вже носять.
Завтра прийдуть гості
Пішком, на машинах,
Не менше, ги двісті
На сисю гостину.
Прийдіть до нас тоже,
Хоть лем на півчаса,
Кождий вам укаже,
Де звернути з траси.
З Лемберга – направо.
Наліво, кіть з Чопа.
Ліпше на біцігльох,
Аводь автостопом.
На тиждень май мало
Ладіться гудіти,
Бисьте памнятали
Відки наші діти,
Де май свальба файна,
Де май добрі люди!
Наша хижа крайна –
Всіх чекати буду!
2009р. тетяна рибар
сокачка - повариха
катран - фартух
кочоня - студень
гентеш - м ясник
рісілювати- терти на терці
капура - ворота
пантлики - чтрічки
адреса: https://www.poetryclub.com.ua/getpoem.php?id=631836
Рубрика: Жартівливі вірші
дата надходження 27.12.2015
автор: isabel